Wednesday, August 10, 2011

അശാര്‍പ്പിന്റെ ചന്തിയുടെ കഥ


അന്ത്രൂക്കയുടെ മോന്‍ അശാര്‍പ്പിന്റെ കൂടെയാണ് ഞാന്‍ രണ്ടാം ക്ലാസ്സില്‍ പഠിക്കുമ്പോള്‍ ഉസ്കൂളില്‍ പോയിരുന്നത്. അശാര്‍പ്പ് അന്ന് എഴാം ക്ലാസ്സില്‍ ആണ്. എനിക്കന്നു ട്രൌസറും ഷര്‍ട്ടും മാത്രമായിരുന്നു വേഷം. അശാര്‍പ്പിനാകട്ടെ വെളുത്ത മുണ്ടും നിറമുള്ള ബനിയനും അതിന്റെ മേലെ ടീ ഷര്‍ട്ടും ഉണ്ടായിരുന്നു. അതിനെക്കാളേറെ അശാര്‍പ്പിനോട് ബഹുമാനം തോന്നാന്‍ തക്ക മറ്റൊരു സംഗതി കൂടി അശാര്‍പ്പിനു ഉണ്ടായിരുന്നു. ഷഡി. ജെട്ടി എന്നും പറയാറുള്ള തികച്ചും ബഹുമാനത്തോടെ ഞാന്‍ കാണുന്ന സംഗതി. നിറമുള്ള പലതരം ഡികള്‍ അശാര്‍പ്പിനു ഉണ്ടായിരുന്നു. പലതും പേര്‍ഷ്യയില്‍ നിന്നും കൊണ്ട് വന്നത്. 
സത്യത്തില്‍ അങ്ങനെ ഒരു സംഗതി ഉണ്ടെന്നുള്ള കാര്യം കണ്ടു പിടിച്ചത് എന്‍റെ കൂര്‍മ്മ ബുദ്ധി ഒന്ന് കൊണ്ട് മാത്രമാണ്. ഒരിക്കല്‍ അറിയാതെ അശാര്‍പ്പിന്റെ മുണ്ടിനടിയില്‍ ഒരു നിറം മാറ്റം ശ്രദ്ധയില്‍ പെട്ടു. ഉടനെ അശാര്‍പ്പിനോട് ചോദിക്കുകയും ചെയ്തു. എന്നാല്‍ അശാര്‍പ്പ് എന്തോ നിഗൂഡമായ രഹസ്യം പോലെ മറുപടി പറയാതെ ഒഴിഞ്ഞു മാറി.
ആഹാ..
കണ്ടു പിടിച്ചിട്ടു തന്നെ കാര്യം.
പിന്നെ എന്നും അശാര്‍പ്പിന്റെ പിറകില്‍ മാത്രമേ ഞാന്‍ നടക്കൂ. തിങ്കളാഴ്ച മഞ്ഞ നിറം..ചൊവ്വ ചെമപ്പ്..ബുധന്‍ കറുപ്പ്..എന്‍റെ വിസ്മയം വര്‍ദ്ധിച്ചു.
ഇനി അശാര്‍പ്പിന്റെ ചന്തി നിറം മാറുന്ന വല്ല പ്രത്യേക ചന്തിയുമാണോ? ഇനി എന്‍റെ ചന്തി നിറം മാറുന്നത് ട്രൌസര്‍ ഇട്ടതു കൊണ്ട് ഞാന്‍ അറിയാത്തതാണോ?
കുളിക്കുമ്പോള്‍ പരിശോധിച്ചിട്ട് തന്നെ കാര്യം.
പക്ഷെ എത്ര ശ്രമിച്ചിട്ടും എന്‍റെ നടു വേദനിച്ചതല്ലാതെ എന്‍റെ സ്വന്തം ചന്തി കാണാന്‍ അപ്പോഴൊന്നും പറ്റിയില്ല. ചന്തി ഭയങ്കര സംഭവം തന്നെ. തികച്ചും നിഗൂഡമായ ഒരു വസ്തുത ഓരോ ചന്തിയും ഒളിച്ചു വെക്കുന്നു. വെള്ള മുണ്ടിടുമ്പോള്‍ മാത്രം അത് മറ്റുള്ളവര്‍ കാണുന്നു.
അങ്ങനെ ഇരിക്കെ ഒരുനാള്‍ അച്ഛന്‍ ചുവരില്‍ അടിച്ചു പിടിപ്പിച്ച കണ്ണാടിയില്‍ നോക്കി മുടി ചീകുന്നത് കണ്ടു. എന്നേക്കാള്‍ വളരെ ഉയരത്തില്‍ ആണ്. ഈ സംഗതിയില്‍ മുഖം നോക്കാമെങ്കില്‍ ചന്തിയും നോക്കാമല്ലോ. ആരും അറിയാതെ ദിവസങ്ങള്‍ കാത്തിരുന്ന് ഒരു നാള്‍ സ്ടൂള്‍ എടുത്തു വച്ചു കണ്ണാടി ഞാന്‍ അടിച്ചു മാറ്റി. എന്നിട്ട് വീടിന്റെ പിന്നാമ്പുറത്തു പോയി ട്രൌസര്‍ അഴിച്ചു കണ്ണാടിയില്‍ നോക്കി.
ഭയങ്കര നിരാശ ആയിരുന്നു ഫലം. കരു കറുത്തൊരു ചന്തി...ഛെ..ശരിയാ നാളെ മഞ്ഞ ആയിരിക്കും.
പിറ്റേന്ന് നോക്കിയപ്പോഴും കറുപ്പ് തന്നെ..
ഈ പരീക്ഷണം ഒരാഴ്ച തുടര്‍ന്നു.
പക്ഷെ എന്‍റെ ചന്തിയുടെ നിറം മാത്രം മാറിയില്ല.
അച്ഛനോടും അമ്മയോടും ചോദിച്ചു: എന്താ അശാര്‍പ്പിന്റെ ചന്തിക്ക് മാത്രം നിറം മാറ്റം.?
അവര്‍ ചിരിച്ചു കൊണ്ടേയിരുന്നു.
എന്‍റെ നിഗൂഡത വര്‍ധിച്ചു.
അശാര്‍പ്പിന്റെ വീട് ചുറ്റി പറ്റിയായി പിന്നെ അന്വേഷണം.
ചുള്ളിയും കോലും കളിക്കനെന്ന ഭാവത്തില്‍ അവിടെയൊക്കെ ചുറ്റി നടന്നു.
ആ നടത്തം പിന്നാമ്പുറത്ത് എത്തി. അലക്ക് കല്ലില്‍ പല നിറങ്ങള്‍...തുണികള്‍...പലതും അശാര്‍പ്പിന്റെ ചന്തിയുടെ നിറങ്ങള്‍...വിസ്മയത്തോടെ ഞാന്‍ അവ എടുത്തു. ഒരു വലിയ ഓട്ടയും രണ്ട് ചെറിയ ഓട്ടകളും...
വാ പൊളിച്ചു നില്‍ക്കവേ കദീസ്ത വന്നു.."എന്താ ചെക്കാ...ഇനിക്കും ഷട്ടി ബെണോ?!"
ഇഞ്ഞി ബല്യ ആളാവുമ്പോ മാങ്ങി തരാ കേട്ടാ..
ഇതെന്തിനാ ? ഞാന്‍ ചോദിച്ചു. അതൊക്കെ ഇഞ്ഞി ബല്യ ആളാവുമ്പോ മനസ്സിലാവും.
എന്നിട്ട് കദീസ്ത എന്‍റെ അമ്മയെ വിളിച്ചു ഉറക്കെ പറഞ്ഞു:
"ശാന്തെടത്തീ ...ഇബനു ഒരു ഷട്ടി മാങ്ങി കൊടുക്കണേ.."
എല്ലാവരുടെയും കൂട്ടച്ചിരിയില്‍  വിസ്മയത്തോടെ വലുതാവുന്ന സ്വപ്നം കണ്ടു നാണത്തോടെ  ഞാന്‍ തല കുനിച്ചു.


Saturday, February 5, 2011

പൊക്കന്‍ നമ്പൂതിരിയുടെ കഥ

ആയിരത്തി തൊള്ളായിരത്തിഅറുപതുകളില്‍  മൊകേരി നാട്ടില്‍ പൊക്കന്‍ എന്നൊരാള്‍ ജീവിച്ചു. കവുങ്ങില്‍ കയറി അടക്ക പറിച്ചും പ്ലാവില്‍ പടര്‍ത്തിയ കുരുമുളക് പറിച്ചും നടക്കുന്ന ഡെയിലി ജീവിതത്തിനിടയില്‍ പൊക്കന്‍ ഒരു മഹാ സത്യം മനസ്സിലാക്കി. ഭൂമിയില്‍ മനുഷ്യര്‍ തന്നെ പല മതക്കാരുണ്ട്. ഒരേ മതക്കാര്‍ തന്നെ പല പല ജാതിക്കാരുണ്ട്. ഇതില്‍ എല്ലാ ജാതിക്കും ഒരേ വിലയല്ല സമൂഹത്തിലുള്ളത്. ചിലര്‍ താണവര്‍. ചിലര്‍ മുന്തിയ ടൈപ്പ് ജാതിക്കാര്‍. അന്ന് വരെ പൊക്കന്‍ ഒരു ഹിന്ദു മാത്രം ആയിരുന്നു. ആയിടെ ആണ് നമ്പൂതിരി ജാതിയെ പറ്റി കേള്‍ക്കുന്നത്. അവരാണത്രേ ഏറ്റവും "ഘും" ഉള്ള ജാതി. അന്ന് തൊട്ട് പൊക്കന്‍ തീരുമാനിച്ചു. ജനിച്ചതോ ഒരു നമ്പൂതിരി ആയിട്ടല്ല. മരിക്കുന്നതെങ്കിലും നമ്പൂതിരി ആയിട്ടായിരിക്കണം.
അങ്ങനെ പൊക്കന്‍ തന്റെ ജീവിതാഭിലാഷം നിറവേറ്റാന്‍ ശ്രമം തുടങ്ങി. ഈ നമ്പൂതിരി എന്നൊക്കെ കേട്ടിട്ടേ ഉള്ളൂ. ഇതുവരെ കണ്ടിട്ടില്ല. അവരുടെ പേരിന്റെ വാലായി നമ്പൂതിരി എന്ന് ചേര്‍ക്കാറുണ്ട് എന്നും നെഞ്ചിനും വയറിനും കുറുകെ പൂണൂല്‍ എന്നൊരു നൂല്‍ ഉണ്ടെന്നും രണ്ട് ദിവസം കൊണ്ട് തന്നെ പൊക്കന്‍ അന്വേഷിച് കണ്ടുപിടിച്ചു. അന്ന് തൊട്ട് തന്നെ "എടാ പൊക്കാ... ഇഞ്ഞി ആ കവ്ങ്ങുംമല്‍ കേറി ആ അടക്കേം കുരുമൊളോം പരിക്കണേ കുഞ്ഞിമ്മോനെ " എന്ന് പറയുന്നവരോടെല്ലാം "പൊക്കന്‍ നമ്പൂതിരീന്നു വിളിച്ച്ചിട്ടില്ലെങ്കില്‍ ഞാന്‍ ബെരൂല അടക്കേം കുരുമൊളോം പരിക്ക്യെനോന്നും " എന്ന് ശട്ടം കെട്ടി. അടക്ക കുരുമുളക് എന്നിവ പറിക്കുക ഒരു പൊതുജന കാര്യമായത്  കൊണ്ടും അന്നാട്ടില്‍ പൊക്കന്‍ മാത്രമേ ആ ജോലി ചെയ്തിരുന്നൂള്ളൂ എന്നത് കൊണ്ടും എല്ലാവരും ഒരുപോലെ പൊക്കനെ പൊക്കന്‍ നമ്പൂതിരി എന്ന് വിളിച്ചു പോന്നു.
എന്നിട്ടും പൊക്കന്‍ തൃപ്തനായില്ല. മറ്റേതിന്റെ കുറവുണ്ടല്ലോ... പൂണൂല്. ആദ്യമൊക്കെ ചാക്ക് നൂലെടുത്തു നെഞ്ഞിനെ ചുറ്റിയും മറ്റൊരെണ്ണം വയറിനു ചുറ്റിയും നടന്നു. "ഇതെന്താ പൊക്കാ... നെഞ്ഞത്തും ബയട്ടത്തും ചുറ്റീന്???" "ഇതാണ് കദീസുമ്മാ പൂണൂല്.."
"ഇഞ്ഞി എന്ത് ബെഗിടത്തരാ പൊക്കാ പറേന്നു?? പൂനൂല്‍ ആണെങ്കില്‍ പൂവൊക്കെ എട്ത്തും?"
സംഭവം ശരിയാണല്ലോ എന്ന് പൊക്കനും തോന്നി. എവിടെ പൂക്കള്‍.???
അന്ന് തൊട്ട് നൂലില്‍ ചെമ്പരത്തി ചെക്കി മുല്ല തുടങ്ങി അവയിലബിള്‍ പൂക്കളൊക്കെ ചുറ്റിയായി പൊക്കെന്റെ നടപ്പ്.
അങ്ങനെ ഒരു ദിവസം ദാസന്‍ മാഷ് പൊക്കനെ കണ്ടു. മൊകേരി നാട്ടിലെ അറിയപ്പെടുന്ന കമ്മുനിസ്റ്കാരനാണ് മാഷ്‌.
"ഇഞ്ഞി എന്താ പൊക്കാ പൂവൊക്കെ ചുറ്റി??"
"ദാസംമാഷേ ഇങ്ങള്‍ അറിഞ്ഞിട്ടില്ലേനോ? ഞാന്‍ നമ്പൂതിരി ആയി. ഇതാണ് പൂനൂല്‍."
"എന്‍റെ പൊക്ക.. ഇതൊന്നുമല്ല പൂനൂല്‍. അതൊരു പൂവില്ലാത്ത നൂലാണ്"
"അയി അസത്ത് കദീസുമ്മ പറഞ്ഞതാ  മാഷെ... പൂനൂലില് പൂ വേണം പോലും."
"പൊക്ക ഇഞ്ഞി ബിജാരിക്കും പോലെ നൂല് ചുറ്റിയാലോന്നും നമ്പൂരി ആവൂല്ല. ഉപനയനം കഴിക്കണം"
"ഓഹോ അതാണല്ലേ വേണ്ടത്" കാര്യം മനസ്സിലായില്ലെന്ന് ഭാവിക്കാതെ പൊക്കന്‍ പറഞ്ഞു.
"എല്ല പൊക്കാ.. ഇഞ്ഞി എന്തിനാണ് നമ്പൂരി ആവുന്നത്. ഭൂമിയില്‍ മനുഷ്യന്‍ എന്ന ഒറ്റ ജാതിയെ ഉള്ളൂ. താണിട്ടും പൊന്തീട്ടും ഒരു ജാതിയുമില്ല. അങ്ങനെ ആര്‍ക്കെങ്കിലും തോന്നുന്നെങ്കില്‍ അതവരുടെ അറിവില്ലായ്മ്മ ആണ്. ഇത് കമ്മ്യൂണിസത്തിന്റെ കാലമാണ് പൊക്കാ. ജന്മിയും കുടിയാനും ഇനി ഇല്ലാ.... എല്ലാ മനുഷ്യനും തുല്യ അവകാശമാണ് ഭൂമിയില്‍."
പൊക്കന്‍ വാ പൊളിച്ചു നിന്നു.
ദാസന്‍ മാഷ് നടന്നു പോയി. പൊക്കന്‍ നിന്നിടത്ത് നിന്നു ആലോചിച്ചു."ഈ മാഷ് എന്തൊക്കെ അലമ്പ് ആണ് പറേന്നത്‌? ഇയാക്കൊന്നുംവേറെ പണിയില്ലേ?"
അങ്ങനെ ഉപനയനം കഴിച്ചു നമ്പൂതിരി ആവാനായി പൊക്കന്റെ ശ്രമം.
മൊകേരി നാട്ടില്‍ അന്ന് ബസ്‌ സര്‍വീസ് ആരംഭിചിട്ടെ ഉള്ളൂ. വളരെ കുറച്ചു നാട്ടുകാരെ മൊകേരി നിന്നു തലശ്ശേരി വരെ പോകുന്ന കുഞ്ഞനന്തന്‍ ബസ്‌ ട്രാന്‍സപോര്ടില്‍ കയറിയിട്ടുള്ളൂ. മൊകേരി നിന്നു തലശ്ശേരി എത്തുമ്പോഴേക്കും വെളുത്ത ആള്‍ കരിപിടിച്ചു കറുത്ത് പോകും. കല്‍ക്കരി കത്തിച്ചാണ് ബസ്‌ ഓടിക്കുന്നത്. പൊക്കനാകട്ടെ ആ പ്രശ്നം ഇല്ലാ. പൊക്കന്‍ സ്വതേ രണ്ടിരട്ടി കറുത്തിട്ടാണ്. അങ്ങനെ ഒരു നാള്‍ പൊക്കന്‍ തലശ്ശേരിക്ക് വണ്ടി കയറി. അവിടെ വിപ്രന്‍ നമ്പൂതിരി ഉണ്ടെന്നു ആരോ പറഞ്ഞു കേട്ടു.
തലശ്ശേരി പട്ടണം ആദ്യമായി കണ്ട പൊക്കന്‍ വാ പൊളിച്ചു പോയി. എന്ത് മാത്രം കച്ച്ചോടക്കാരാ. സോഡാ എന്നൊരു സാധനത്തെ പറ്റി കേട്ടിട്ടുണ്ട്. ഇതാ സോഡാ വില്‍ക്കുന്ന പീടിക. കായുണ്ടകള്‍ നിരത്തി വച്ചിരിക്കുന്നു.
"ഒരു സോഡാ...."
"തിന്നേന്‍ എന്താ ബേണ്ടത്‌?" കടക്കാരന്‍ ചോദിച്ചു.
"ഒരു കായുണ്ട തന്നേക്കി"
സോഡയും കായുന്ടയും കഴിക്കുന്നതിനിടയില്‍ പൊക്കന്‍ പീടിയക്കാരനോട് ചോദിച്ചു "ഈ വിപ്രന്‍ നമ്പൂതിരിയുടെ വീടെവിടെയ"
"അതാ.. ആ വളവില്‍ കാണുന്ന വീടാ"
രണ്ട് പൈസയും കൊടുത്തു പൊക്കന്‍ വേഗം അങ്ങോട്ടേക്ക് നടന്നു.
മുറ്റത്ത്‌ തന്നെ ഉണ്ടായിരുന്നു വിപ്രന്‍ നമ്പൂതിരി.
"ആരാ"
"മൊകേരി നാട്ടിന്നു വരുന്നതാ... പൊക്കന്‍"
ഒന്ന് സംശയിച്ചു, വിപ്രന്‍ നമ്പൂതിരി ചോദിച്ചു"ഏതാ ജാതി?"
"*$@***@" പൊക്കന്‍ മറുപടി പറഞ്ഞു.
"ശപ്പന്‍... പടികയറി വന്നിരിക്കുന്നു. കടക്കു പുറത്തു.... ആകെ നാഷമാകിയല്ലോ ഭഗവാനെ."
തീര്‍ത്തും അപമാനിക്കപ്പെട്ടവനായി പൊക്കന്‍ പുറത്തിറങ്ങി. ദാസന്‍ മാഷ്‌ പറഞ്ഞത് എത്ര ശരിയാണ്.
അടുത്ത് തന്നെ പന്തക്കല്‍ എന്നൊരു സ്ഥലമുണ്ടെന്നും അവിടെ നല്ല മദ്യം കിട്ടുമെന്നും പൊക്കന്‍ കേട്ടിട്ടുണ്ട്. ഇന്നത്തെ നിരാശ മാറ്റാന്‍ അതേ ഉള്ളൂ വഴി.
പന്തക്കല്‍ എത്തുമ്പോഴേക്കും വൈകിട്ടായി. നടന്നാണ് പോയതും. 
"പയന്റ് ...... ലാര്‍ജ് ......." സ്വര്‍ഗതിലെത്തി ഭാഷ അറിയാത്തവനെ പോലെ പൊക്കന്‍ പരുങ്ങി.
എന്തായാലും ഒന്ന് രണ്ട് കുപ്പി കുടിച്ചു തീര്‍ത്തു.
ബോധം കുറച്ചു മാത്രം ബാക്കി  വെച്ചു പൊക്കന്‍ നടന്നു.
നടക്കുന്ന വഴിയരികില്‍ ഒരു വളര്പ്പന്‍ കിടക്കുന്നുണ്ടായിരുന്നു. ശംഖുവരയന്‍ വെള്ളിക്കെട്ടന്‍ എന്നൊക്കെ അറിയപ്പെടുന്ന പാമ്പാണ്. പൊക്കന്‍ അതിനെ സൂക്ഷിച്ചൊന്നു നോക്കി. എന്നിട്റെടുത്തു കൈയ്യില്‍ പിടിച്ചു. "കൊള്ളാലോ... പൂനൂലാക്കാന്‍ പറ്റിയ നൂല്" എന്നും പറഞ്ഞു പാമ്പിനെ എടുത്തു നെഞ്ചിനു കുറുകെ ചുറ്റി ... വാലും തലയും ചേര്‍ത്ത് കെട്ടി. അഭിമാനത്തോടെ നടന്നു.... "പൊക്കന്‍ നമ്പൂതിരി വരുന്നു... ശപ്പന്മാര്‍ ... മാറി നിക്കൂ... ആകെ ആശുധ്ധായല്ലോ ഭഗവാനെ..." എന്നൊക്കെ വിളിച്ചു
പറഞ്ഞു നടന്നു.
അപ്പോഴാണ്‌ കുഞ്ഞനതന്‍ ബസ്‌ അതുവഴി വന്നത്. മൊകേരി നാട്ടിലേക്ക് അവസാനത്തെ ട്രിപ്പ്‌ ആണ്. പൊക്കന്‍ അതില്‍ കയറി.
"അങ്ങോട്ട്‌ നിക്കൂ. പൊക്കന്‍ നമ്പൂതിരി ബെരുന്നത് കണ്ടില്ലെട...".. എല്ലാരും പേടിച്ചു മാറി. 
"പൊക്കന്‍ നമ്പൂതിരിയെ ഇങ്ങനെ ബഹുമാനിക്കരുത്.... കുറച്ചു കുറച്ചു ബഹുമാനിച്ചാ മതി...." എന്നൊക്കെ വെളിവില്ലാതെ പറഞ്ഞു.
ദാസന്‍ മാഷ് ബസില്‍ ഉണ്ടായിരുന്നു.
"എന്താ പൊക്കാ.... പാമ്പിനെ എടുത്തു നെഞ്ചത്ത് ചുറ്റിയാ നമ്പൂരി ആവോ?... ഇഞ്ഞി അയിനെ എടുത്തു ചാടിക്കാള.."
പൊക്കന്റെ പരാക്രമം കണ്ടു പാമ്പ് ഒരു കടി കൊടുത്തു. 
"ബസ്‌ നേരെ തലശ്ശേരി ആസ്പത്രിക്ക് വിട്", ദാസന്‍ മാഷ് അലറി.
*********************************************
ശേഷം : അഞ്ചു ദിവസങ്ങള്‍ക്കു ശേഷം പൊക്കന്‍ ജീവിതത്തിലേക്ക് തിരിച്ചു വന്നു. കമ്മ്യൂണിസ്റ്റ് പാര്‍ടിയില്‍ ചേര്‍ന്ന്! 

Sunday, December 5, 2010

തെക്കേല അവുള്ളയും ഏണി മൂസയും പുലിയെ പിടിക്കാന്‍ പോയ കഥ

തലശ്ശേരി  രാജ്യത്തു നടന്ന കഥയാണ്...
ഞമ്മളൊക്കെ  ഉസ്കൂളില്‍ പഠിക്കുന്ന കാലത്ത് പുളി അച്ചാര്‍ മേടിച്ചു തിന്നാന്‍ പോവുന്ന ഒരു പീടിയ ഇണ്ടായിരുന്നു.
തെക്കേല അവുള്ള എന്നൊരു മനിശന്‍ ആണ് അത് നടത്തിയിരുന്നത്.
അവുള്ള ഒരു ഘടാഘടിയന്‍ ആയിരുന്നു. ഭീമാകാരം.
അവുള്ളയുടെ പീടിയയില്‍ എപ്പോളും വന്നിരിക്കുന്ന ഒരു വെളുത്ത മൊട്ടത്തലയുള്ള ആളാണ്‌ ഏണി മൂസ. ഭയങ്കര നീളമായത് കൊണ്ടാണ് നാട്ടുകാര്‍ "ഏണി" എന്ന് വിളിച്ചത്.
ഉസ്കൂളില്‍ ഇന്റര്‍ ബെല്‍  സമയത്ത് കോലൈസ് വിക്കാന്‍ വരുന്നയാളാണ് പെരുമാള്‍... പെരുമാള്‍ എന്ന് പറഞ്ഞാ കറുത്ത ഒരു തമിളന്‍... അയാളെ കണ്ടാല്‍ ആരും ഐസ് വാങ്ങി തിന്നൂല. പക്ഷെ അങ്ങനത്തെ കിര്ത്തൊക്കെ ഉസ്കൂളിലെ പഠിത്തം കയിഞ്ഞ ശേഷമാണു ഞമ്മള്‍ ഓര്‍മിച്ചത്‌. അതുവരെ പെരുമാളിന്റെ കോല്‍ ഐസ്  പിള്ളേര്‍ക്ക് ബല്യ കാര്യായിരുന്നു..
ബെല്ലടിക്കണ്ട താമസം ഞമ്മളൊക്കെ അവുള്ളന്റെ പീടിയക്കോനായില്‍ തിരിഞ്ഞു മറിഞ്ഞു കളിക്കും... ഒന്ന് രണ്ട് പുളിയച്ചാര്‍ മേടിച്ചു തിന്നും. ചിലപ്പോഴൊക്കെ അവുള്ള കാണാതെ പുളിയച്ച്ചാര്‍ കക്കും.
അപ്ലത്തെക്കും പെരുമാള്‍ സൈക്കിളില്‍ ഐസ് കൊണ്ടുവരും. പിന്നെ ഐസിന്റെ പിന്നാലെ... ചിലപ്പോ മേടിക്കും.. അല്ലെങ്കില്‍ മേടിച്ചവര്‍ തിന്നുന്നത് നോക്കി വായില വെള്ളം ഒലിപ്പിച്ച് നിക്കും. അപ്പൊ ചെല പിള്ളേര് കൊതി കൂടാന്ടിക്കാന്‍ ഐസ് പൊടിച് തരും. ചെല പിള്ളേര്‍ മൂക്കട്ട ഐസില്‍ ആക്കി "ഇന്നാ.. ഇനിക്ക് മേണോ?" എന്നൊക്കെ ചോയിക്കും.
ചെല ദിവസം  പെരുമാള്‍ നാരങ്ങ കൊണ്ട് വരും. അത് നടുക്കനെ മുറിച് മുളകും ഉപ്പും ചേര്‍ത്ത് വിക്കും.. അതിനു രണ്ടുര്‍പ്പിയ ആയിരുന്നു. ഐസ് അയിമ്പത് പൈശക്ക് കിട്ടും.
ഒരു ദിവസം..
പെരുമാള്‍ വന്ന പാടെ തെക്കേല അവുള്ളയോടു ഒച്ചത്തില്‍ വിളിച്ചു പറഞ്ഞു."പുലി വന്താച്ച് ... പുലി വന്താച്ച്.."
കേട്ട പാതി കേള്‍ക്കാത്ത പാതി പിള്ളേരെല്ലാം പാഞ്ഞു ഉസ്കൂളിനകത്തു കേറി വാതിലടച്ചു... അത് കണ്ടു മാഷമ്മാരും ടീച്ചര്‍മ്മാരും ഓപ്പീസില്‍ കയറി വാതിലടച്ചു.. "എന്റമ്മേ തലശേരീലും പുലിയാ?", മാഷമ്മാരും ടീച്ചര്‍മ്മാരും മൂക്കത്ത് വിരല്‍ വെച്ചു.
എല്ലാരും ജനലില്‍ കൂടി പുറത്തു നടക്കുന്ന വന്‍ സംഭവം കണ്ടു.
തെക്കേല അവുള്ള പുലിയെ പിടിക്കാന്‍ പോവുകയാണ്. വലിയൊരു ചാക്ക് കയ്യിലുണ്ട്.
"മൂസേ ഇഞ്ഞി ബെരുന്നോ?", അവുള്ള ചോദിച്ചു.
"ഞമ്മക്കെന്നാ സയിക്കളിമ്മല്‍ പോവാ...", എന്നും പറഞ്ഞു ഏണി മൂസ പെരുമാളിന്റെ സൈക്കിള്‍ മേടിച്ചു ഐസ് പെട്ടി അഴിച്ചു താഴെ വെച്ചു, "പെരുമാളെ ഇന്ജീം പോരി" .
എന്നിട്ട് മൂന്നാളും  കൂടി തലശ്ശേരി ഭാഗത്തേക്ക്‌ സൈക്കിള്‍ ചവുട്ടി. ഏണി മൂസ സൈക്കിള്‍ ചവുട്ടി. ചാക്കും പിടിച്ചു തെക്കേല അവുള്ള പിറകിലും പെരുമാള്‍ ഐസ് പെട്ടി പിടിച്ചു മുന്നിലും കയറി ഇരുന്നു പോവുന്നതു നെഞ്ഞിടിപ്പോടെയാണ് പിള്ളേരും മാഷമ്മാരും ടീച്ചര്‍മ്മാരും ജനലില്‍ കൂടി നോക്കി നിന്നത്.
എല്ലാര്ക്കും തെക്കേല അവുള്ളയോടും ഏണി മൂസയോടും അതിഭയങ്കര ബഹുമാനം തോന്നി.
കണ്ണന്‍ മാഷാണ് വിഷയം എടുത്തിട്ടത്: "എല്ലപ്പാ... ഇതിപ്പോ ഞമ്മക്കൊന്നും ചോറ് തിന്നാന്‍ പോണ്ടേ? പിള്ളര്‍ക്ക് കഞ്ഞി കൊടുക്കണ്ടേ?"
ഹെഡ് ടീച്ചര്‍ മിണ്ടിയില്ല...."സുമതി ടീച്ചറെ.. ടീച്ചറല്ലേ ഹെഡ് ടീച്ചര്‍.... "
ശ്വാസം വിട്ട് കൊണ്ട് ഹെഡ് ടീച്ചര്‍ പറഞ്ഞു:"അതിപ്പോ പുലിക്കു മനസ്സിലാവോ കണ്ണംമാഷേ?"
വിജ്യന്‍ മാഷ് ഇടപെട്ടു:"തലശ്ശേരീല്‍ പുലി  എറങ്ങാന്‍ ഒരു ചാന്‍സും ഇല്ലാലോ ടീച്ചറെ... തലശ്ശേരി കടല്‍ അല്ലെ? കാട്ടിലെല്ലേ പുലിയും കടുവയും."
ബിന്ദു ടീച്ചര്‍ അത് ശരി വെച്ചു:"ശരിയാ... "
പ്യൂണ്‍ കിട്ടന് ഒരു സംശയം ഉണ്ടായിരുന്നു,"എനി കടല്‍പ്പുലി ആയിക്കൂടാന്നിണ്ടോ"
"ഒന്ന് മിണ്ടാണ്ടിക്കെന്റെ കിട്ടാട്ടാ.. കടല്പ്പുലിയൊന്നും ഈടെം ഏടെയും ഇല്ലാ.", ഹെഡ് ടീച്ചര്‍ പറഞ്ഞു, "തെക്കേല അവുള്ള ബെരട്ടെ.... എന്നിറ്റ് മതി ബാക്കിയെല്ലം"
പിള്ളേര്‍ക്കെല്ലാം സന്തോഷം..
ക്ലാസ് ഇല്ലാലോ.. കൊറേ നേരം ജനലും പിടിച്ചു അവുള്ളയും ഏണി മൂസയും വരുന്നതും നോക്കി നിന്നു.
പിന്നെ ബോറടിച്ചു ഗോട്ടി കളിച്ചു. ഏതോ ചെക്കന്‍ ചുള്ളിയും കോലും കൊണ്ടുവന്നതും എടുത്തു കുറെ കളിച്ചു...
പിന്നെ എല്ലാര്ക്കും വിശപ്പ്‌ കൂടി...കളിയൊക്കെ നിര്‍ത്തി.
ഉച്ച ഒരു രണ്ടര മണി ആയി... നോക്കുമ്പോ ദൂരെ നിന്നു തെക്കേല അവുള്ളയും ഏണി മൂസയും നടന്നു വരുന്നു.. അവുള്ളയുടെ ചാക്കില്‍ കനത്ത എന്തോ ഉണ്ട്...
"പുലി തന്നെ", കിട്ടേട്ടന്‍ പറഞ്ഞു.
ഹെഡ് ടീച്ചറും പറഞ്ഞു,"ചരയിക്കണേ... ചത്തിനോന്നു നോക്കിയിട്ട് പോയാ മതി".
പിള്ളേരെല്ലാം വിശപ്പ്‌ മറന്നു പുലിയെ കാണാന്‍ തടിച്ചു കൂടി.
തെക്കേല അവുള്ള വന്ന പാടെ ചാക്ക് പീടിയക്കോനായില്‍ വെച്ചു. തൊട്ടടുത്ത്‌ ഏണി മൂസ നിപ്പുണ്ട്.
ഹെഡ് ടീച്ചര്‍ പറഞ്ഞു:"കണ്ണംമാഷ് പോയി പുലി ചത്തിനോന്നു നോക്ക്. എന്നിറ്റ് ഞമ്മലെല്ലം ബെരാം"
കണ്ണന്‍ മാഷ് ധൈര്യം ആവാഹിച്ചു വിറച്ചു കൊണ്ട്  അവുള്ളയുടെ പീടിയെന്റെ അടുത്ത് പോയി.
"അവുള്ളക്ക .....", ബഹുമാനത്തോടെ ചോദിച്ചു,"അവുള്ളക്ക....ഇങ്ങള് പുലിയെ പിടിച്ചിനാ? അയിനിപ്പോ ജീവനിണ്ടാ?"
തെക്കേല അവുള്ള ഞെട്ടുന്നത് എല്ലാരും കണ്ടു.
ഏണി മൂസ വാ പൊളിച്ചു നിന്നു പോയി.
"ഇങ്ങളെന്നാ കണ്ണംമാഷേ പറേന്നത്‌? എന്ത് പുലി ഏത് പുലി?", അവുള്ള ഞെട്ടല്‍ മാറാതെ ചോദിച്ചു.
"പെരുമാള് പറഞ്ഞിറ്റ് ഇങ്ങളും മൂസേം പുലിയെ പിടിക്കാനെല്ലേ പോയത്?"
"മാഷെ അതിങ്ങക്ക് കേട്ടത് തെറ്റ്യതാ.... ഞമ്മള് പുളി മേടിക്കാന്‍ പോയതാ.. പുളി അച്ചാര്‍ ഇണ്ടാക്കി പിള്ളെര്‍ക്ക് കൊടുക്കണ്ടേ... ആയിനാന്ന്....."
"അപ്പൊ പെരുമാള്‍ തൊള്ള തൊറന്നു കൂക്കിയിട്ടതെന്തിനേനു?", കണ്ണംമാഷ് വിശ്വാസം വരാത്തെ ചോദിച്ചു.
"കൊറേസായി തലിശ്ശേരി പുളി കിട്ടാനേ  ഇല്ലേനു... അതാ ഞാന്‍ ഓനെ ഏപ്പിച്ചത്... ഓന്‍ തലിശേരീന്നാണല്ലോ  എല്ലാന്നും ബെരുന്നത്....", എന്നിറ്റ് ചാക്ക് തുറന്നു കാണിച്ചു കൊടുത്തു... സംഭവം പുളി തന്നെ.
അപ്പോഴും  പുലിയെ കാണാന്‍  ജനലിലൂടെ മത്സരിച്ചു  നോക്കുകയായിരുന്നു, പിള്ളേരും മാഷമ്മാരും ടീച്ചര്‍മാരും.!